Ekishdan oldin tuproqni tayyorlash uchun vertikal valli rotatsion kultivatorlarni asoslash va tahlil qilish

Ekishdan oldin tuproqqa ishlov berish texnologiyalarini takomillashtirish qishloq xo‘jaligi mashinasozligining muhim yo‘nalishlaridan biri bo‘lib qolmoqda. So‘nggi yillarda vertikal valli rotatsion kultivatorlarga alohida e’tibor qaratilmoqda, chunki ular bir vaqtning o‘zida tuproqni yumshatish, maydalash, tekislash va zichlash operatsiyalarini bajarish imkonini beradi. Biroq, mavjud rotatsion kultivatorlar yuqori energiya sarfi, ortiqcha metall sig‘imi hamda mahalliy tuproq-iqlim sharoitlariga moslashuvchanligining yetarli emasligi bilan tavsiflanadi.Ushbu tadqiqotda Germaniya, Turkiya, Xitoy, Rossiya va boshqa mamlakatlarda ishlab chiqilgan mavjud vertikal o‘qli rotatsion kultivatorlar, shuningdek, rotatsion ish organlarini optimallashtirishga oid patent yechimlari tahliliy jihatdan ko‘rib chiqilgan. Rotatsion kultivatorlarning texnologik va konstruktiv parametrlari, jumladan, rotorning aylanish chastotasi, pichoq geometriyasi va ishlov berish chuqurligi qiyosiy tahlil qilingan. Pichoqning o‘rnatilish burchagi va kinematik parametrlarning tuproqni maydalash sifati hamda energiya sarfiga ta’siri baholangan.Tahlil natijalari shuni ko‘rsatdiki, mavjud mashinalarning aksariyati dala kengligining butun qismiga ishlov beradi. Bu esa yonilg‘i sarfining ortishiga va tuproq strukturasi hamda namlikni saqlash xususiyatlariga salbiy ta’sir ko‘rsatishi mumkin. O‘tkazilgan tahlil asosida urug‘ joylashtiriladigan zonada tuproqqa lokal ishlov berishga qodir, resurs tejamkor vertikal valli rotatsion kultivatorni ishlab chiqish zarurati asoslab berildi. Olingan natijalardan mahalliy qishloq xo‘jaligi sharoitlariga moslashtirilgan energiya tejamkor kombinatsiyalangan tuproqqa ishlov berish va ekish mashinalarini ishlab chiqishda foydalanish mumkin [1]